ANGAN-ANGAN NI BAYO PARPIKEK

ANGAN-ANGAN NI BAYO PARPIKEK
BAYO PARPIKEK

Oleh: Edi Nasution *)

line psp ANGAN ANGAN NI BAYO PARPIKEK

Manyogot dope sidumadang ari, marnambur-nambur dope eme di saba an, madung marangkat si Katoid tu dolok ni huta, i ma tu arangan menek na di tor Siojo. Di lombang nai adong bondar saba na melduk-melduk mangihutkon topi-topi ni parsabaan na bolak i. Tu gincat saotik adong kobun-kobun ni alak huta i. Suan-suanan na antong adong torung, lasiak, kacang panjang, pitulo, atope bulung gadung. Oni adong juo manggis, tarutung, lancat dohot na asing-asing. Tar i topi bondar i, adong tubu sada batang ni marapolom na godang. Bope antong batang ni marapolom on godang, taiba biaso do i panaek dakdanak dompak marmayam tu kobun-kobun i salaos pabutong-butongkon bituana mangan marapolom.

Alak na get markerjo tu saba pentong marroan juo ma sada-dua di sogot ni ari na ngali i, jinjing adangan dohot cangkul di abarana, marite-ite di batangi ni saba i. Sasaulak tarbege muse jou-jou ni sada bayo tu bayo na asing: “Joooooooooouuuuuuuu … !!!” Mamultakkon lungun di sogot ni ari i.

Sampe tu bondar ni saba i, tarbege mada di si Katoid sora ni ambaroba sian marapolom i, i tangan nia leng jinjing cangkah dohot pamikekna ambaroba juo. Adope, “pademon i taon cangkah parpikek on di marapolom i“, ning roa nia. Dung mangite jambatan na menek di bondar saba i, mardalan saotik na i, sampe ma ia tu batang ni marapolom i. Bulus i pajuguk ia i toru nai salaos mambuat sigaret sian cakuk. Songon na torang parakalan ni ibana, nida sian parbohi nia, dung mangidup sangarsik-dua arsik, marbual-bual doma timbus na haruar sian papangan na: tarsongon pangarsik ni dongan ni si Jenggo di filim-filim Koboi nai putar di Beskop Sawahan an.

Dung habis sabatang sigaret, i panaek ia ma batang ni marapolom i, oni tali ni cangkah sangkot di tolonan na. Inda sadia lolot, si Katoid madung sampe tu ginjang, jongjong di sada dangka salaos marpikir-pikir sanga idia na pade tibalan ni cangkah pamikek on. Dungi, manek muse ia mulak manopotkan dangka na hum gincat, i sima i patibal ia cangkah pamikek i. Dung salose manaon cangkah pamikek on, ia pe mijur mulak tu toru ni batang marapolom i. Marongok santongkin, dungi i patorus ia pardalanan tu kobun apea nia tar tu dolok saotik. Sampe tu kobun apea i, mangguris ma ia sian batang ni apea na sada tu apea na lain, markuliling-kuliling di kobun apea i, adong do dua jom lolot na.

Baca Juga :  Boss Kecolongan

Salose mangguris, kehe ia mulak tu lombang mangaligin cangkah parpikek nia i. Inda dao sian batang ni mapaolom i, i tatap-tatap ia sanga madung adong amporik na masuk tu cangkah i. Bo, rupana jeges rasoki nia sadari i, adong sada amprik ambaroba na masuk tu cangkah parpikek i. Bulus i lojong ia tu batang ni marapolom an, tolap tu si manaek muse ia maripas-ipas tu gincat manopotkon cangkah parpikek nai taon di dangka na patolu on. Sampe tu lambung ni cangkah, na sonang mada nida roa nia paida-ida amporik ambaroba na dapot on, rupana boru-boru, madabu tama tu amporik pamikek nia jantan. Hatiha get mambuat cangkah parpikek i, i bege ia sora ni alak di bondar saba i, tarpaida ma di sia sada dadaboru dompak maridi mangusa-usa pamatang na. “Alale, na jeges boti na bontar mantong boru-boru na maridi i“, mandok di bagasan roa nia. Sasaulak dorsik taroktok nia boti mangkat-angkat dongan simagodang na hatiha boru-boru na dompak maridi i mangusa-usa arumpang dohot kihik na, sasaulak marbukak muse otik-otik salin maridi nai pake ni boru-boru i. Indabe da, humotar doma pat nia. Bope songon i, mata nia leng na totop manatap-natap boru-boru na maridi i. Ro di bagasan roa nia: “Anggo induk ni tataringku da songoni tamana, na sonang mada ngolu on, padiar pe marmate-mate karejo tu saba dohot tu kobun sasadari u taonkon do i“. Inda be na diingot nia be amporik dohot cangkah nia i, marangan-angan do ma ia tu dia-dia patunda bagak ni boru-boru na dompak maridi i, lale pangaroai nia, marrarat-rarat tu jae-julu.

Inda binoto-binoto tarbege sora: “pak …. rabaaaaaassssss … buuurrrrrrrrrrr ….” matipul dangka parjongjongan ni si Katoid i torus madabu muse ia tu bondar saba i, pas tu jolo ni boru-boru na dompak maridi i. “Aaaaaaaaauuuuuuuuuuuuuuuuuuuuuu” manyongkir boru-boru i. Arani panyongkir ni boru-boru on, bulus marlojongan alak na dompak marbabo di saba i tu bondar saba an. Di bondar sabai i, ida alai induk ni tataring ni si Jatorkis tangis tarilu-ilu, i lambung nai si Katoid bajuna maek-maek, pamatang na leng payak inda bisana jongjong arani ancitna na madabu i sian dangka ni marapolom i tu bondar saba i.

Baca Juga :  3 Wanita, 3 Kelebihan

Aha na mangua?” ning alak parsaba i. Anggo boru-boru i leng tangis sajo dope, inda haruar obar na. Si Katoid pe antong sip juo, mur mabiar boti ila na roana paida-ida alak na bahat i. Dua alak mijur tu bondar saba i, i angkat kalai si Katoid tu ginjang, torus i oban kalai tu sopo na donok sian bondar saba i. Dungi i painum kalai antong, baru ma si Katoid marcarito bahaso ia madabu sian marapolom arani dangkana masopak hatiha ia get mambuat cangkah pikek na i taon nia di marapolom i.

Mambege obar ni si Katoid i, sada-dua alak na adong di si mikim-mikim, oni adong juo antong na mantata-tata, matukakkak-matukikkik. Sadebana muse mandok di bagasan roa: “Angkentong, angkon na marpikek di lambung ni tapian ni dadaboru, toskon bayo na oto!!!”

=========by edi nasution March’08

<blockquote>
<p style=”text-align: left;”>Biography Penulis:</p>
<p style=”text-align: left;”><a rel=”attachment wp-att-5262″ href=”https://apakabarsidimpuan.com/2010/03/keterkaitan-beberapa-musik-tradisi-mandailing-dengan-tabu-bagian-1/edi-nasution/”><img class=”alignleft size-thumbnail wp-image-5262″ title=”Edi Nasution” src=”https://apakabarsidimpuan.com/wp-content/uploads/2010/03/Edi-Nasution-150×150.jpg” alt=”” width=”100″ height=”100″ /></a>hails from Gunung Tua-Muarasoro, Kotanopan – Mandailing Julu, where he was born on 13 March 1963. He obtained his bachelor degree in Ethnomusicology in 1995 from the University of North Sumatra (USU) in Medan, Indonesia. He is the author of Tulila: Muzik Bujukan Mandailing, a study of Mandailing courtship music, published in 2007 by Areca Books (www.arecabooks.com) Penang, Malaysia.</p>
<p style=”text-align: left;”><a href=”http://bayosuti.blogspot.com”>http://bayosuti.blogspot.com</a></p>
</blockquote>

Biography Penulis:

hails from Gunung Tua-Muarasoro, Kotanopan – Mandailing Julu, where he was born on 13 March 1963. He obtained his bachelor degree in Ethnomusicology in 1995 from the University of North Sumatra (USU) in Medan, Indonesia. He is the author of Tulila: Muzik Bujukan Mandailing, a study of Mandailing courtship music, published in 2007 by Areca Books (www.arecabooks.com) Penang, Malaysia.

http://bayosuti.blogspot.com

CATATAN : Artikel ini sudah dipublish sejak 11 tahun yang lalu. Informasi di dalamnya kemungkinan sudah tidak relavan dengan saat ini. Mohon dibaca dengan bijak, dengan melihat informasi terbaru/sumber-lain sebagai penyeimbang.

Be the first to comment

Leave a Reply

Alamat email Anda tidak akan dipublikasikan.


*